ചിഹ്നം ഇല്ലെങ്കിലും പ്രവർത്തകർ കൂടെയുണ്ട്. മുന്നണിയാണ് ജയിക്കേണ്ടത്. തിരഞ്ഞെടുപ്പിൽ വൻ വിജയം നേടും: പിജെ ജോസഫ്.

രണ്ടില എന്ന അഭിമാന ചിഹ്നവും കേരള കോണ്ഗ്രസ്സ് എം എന്ന പേരും പോയെങ്കിലും ശക്തമായി തിരഞ്ഞെടുപ്പിനെ നേരിടാനാണ് പിജെ ജോസഫിന്റെ തീരുമാനം.

രണ്ടില ലഭിക്കാത്തത് തെരെഞ്ഞെടുപ്പില്‍ തിരിച്ചടിയാകില്ല,  ചിഹ്നത്തേക്കാള്‍ പ്രധാനം മുന്നണിയാണെന്നും, തദ്ദേശ തെരഞ്ഞടുപ്പില്‍ ഐക്യ ജനാധിപത്യ മുന്നണി മികച്ച വിജയം നേടുമെന്നും ജോസഫ് വിഭാഗം നേതാക്കള്‍ പറഞ്ഞു.

കേരള കോണ്‍ഗ്രസ്സുകാര്‍ക്ക് സുപ്രധാനമാണ് രണ്ടില ചിഹ്നം. പാര്‍ട്ടി പിളര്‍ന്നതിന് ശേഷമുള്ള ആദ്യ തെരഞ്ഞെടുപ്പ് എത്തുമ്ബോള്‍ ചിഹ്നം ജോസ് കെ. മാണിയുടെ പക്കലാണ്. ജോസ് കെ മാണിയ്ക്ക് ചിഹ്നം കിട്ടാതിരിക്കാൻ ജോസഫ് ആവത് ശ്രമിച്ചു പക്ഷെ നടന്നില്ല.

കേരള കോണ്‍ഗ്രസ്കാര്‍ക്ക് രണ്ടില ചിഹ്നം ഒരു വികാരമല്ലെ എന്ന ചോദ്യത്തിന് ജോസഫ് വിഭാഗം നേതാക്കള്‍ നല്‍കുന്ന ഉത്തരം ഇങ്ങനെയാണ്.

കേരള കോണ്ഗ്രസ്സിന്റെ വികാരമായ ചിഹ്നമില്ലെങ്കിലും പ്രവര്‍ത്തകര്‍ കൂടെയുണ്ടെന്നാണ് ജോസഫ് വിഭാഗം പറയുന്നത്. എങ്കിലും ചിഹ്നം ജോസ് വിഭാഗത്തിന് നല്‍കിയ ഹൈകോടതി സിംഗിള്‍ ബെഞ്ച് വിധിക്കെതിരെ ഡിവിഷന്‍ ബെഞ്ചിനെ സമീപിക്കാനുള്ള നീക്കങ്ങളും പിന്നാമ്പുറത് നടക്കുന്നുണ്ട്.